i-scripta.com
de mauro piredda, p. iva 01640180913
cuntatos: 3898213416 - info@i-scripta.com
polìtica in contu de privadesa - polìtica in contu de cookies
©
Chie so
giornalista, tradutore, dotzente
Mauro Piredda
Giornalista
Tradutore
Dotzente
Apo comintzadu a isvilupare sa capatzidade de contare in sardu sos tempos de oe a bellu a bellu ma die cun die. A primu gràtzias a sa Gazeta, un'esperimentu giornalìsticu voluntàriu in pare cun duos cumpàngios e maistros (annestru prus chi non profetosu). A pustis iscriende in sa pàgina Limbas 3.0 de La Nuova Sardegna, cun SardiniaPost, IlMinuto, Istòrias e àteras rivistas. Semper cun sa punna de aunire sa sìntesi cun s'arresonu fundudu, sos tempos de publicatzione cun sos de chirca e de iscumprou, su registru narrativu de sas novas cun su limbàgiu dèghidu, sa chirca terminològica moderna cun s'amparu de sos faeddos e de sa sintassi de su connotu linguìsticu nostru.
Trans dùcere, in latinu. Est a nàrrere "giùghere addae". E peleosu est su caminu bortadore giughende·nche faeddos e sentidos dae una limba a s’àtera. Mescamente batende·nde·los a una limba minorizada che a sa nostra. Mancari custu traduo: faghende s'operadore linguìsticu e movende dae su registru amministrativu de sos entes locales; movende dae sa netzessidade narrativa de chie traballat in sos territòrios cun sa cultura; movende dae sa literadura internatzionale pro fàghere brotare su sardu dae sas bucas de sos personàgios chi ànimant un’istòria. Tradutzione che a traditzione, duncas (dae tràdere, trasmìtere, cunsignare, intregare). Ca est pro sa gente nostra, pro nois etotu chi traduimus.
Mi so laureadu in Tàtari, dende e leende su màssimu in su cursu magistrale de Editoria, comunicatzione multimediale e giornalismu. Sighende·bi·la cun cussas matèrias, como so dotzente esternu de Teorias e tècnicas de sa comunicatzione (in su Litzeu Asproni de Nùgoro) suspende dae sos pitzocos sa curiosidade ischida e ischìpida de una generatzione chi meda at a nàrrere. Ma dotzente so finamentas de unos cantos cursos de sardu (tèngio sa tzertificatzione orale regionale "Nara·mi" e cumpetèntzias Qcer atestadas a livellu C1 dae sa RaS e dae s'Universidade de Casteddu) pro chi s'iscritura sua, normada e normalizada, non gherret cun sa richesa de una limba-iscusòrgiu che a sa nostra.
i-scripta.com
de mauro piredda, p. iva 01640180913
cuntatos: 3898213416 - info@i-scripta.com
polìtica in contu de privadesa - polìtica in contu de cookies
©