Novas bortadas e techno-faddinas

Unu die de unos 30 annos a como, cando istudiaia in sas superiores de Tiesi, sa professora de inglesu nos deit sos còmpitos a domo: a bortare unu testu dae s’italianu. Unos cantos cumpàngios, sende chi copiende·si·lu pari-pari resurtaiant totu cantos cun sa matessi tradutzione, furrieint «le chiese» (verbu “pedire”) in «the churches», est a nàrrere “sas crèsias”.

Si chèrgio ammentare custa cosa curiosa est ca sas dies coladas unu giornale italianu, traduende male dae sa fonte, at publicadu una nova narende chi sa mùsica techno est patrimòniu immateriale mundiale de s’Unesco. Fatu-fatu àteros giornales, fidende·si de su primu e sena pensare a iscumproos autònomos, ant dadu sa matessi nova. Làstima chi no est gasi sa cosa.

Sa nova chi aiant dèvidu dare est chi su guvernu tedescu, e non s’Unesco, at disinnadu de nche pònnere sa “technokultur” berlinesa in su registru natzionale (e in cussu ebbia) de sos patrimònios culturales immateriales.

«Die Kulturministerkonferenz der Länder und die Beauftragte der Bundesregierung für Kultur und Medien – leghimus – haben heute beschlossen, das Bundesweite Verzeichnis des Immateriellen Kulturerbes zu erweitern». Est a nàrrere chi sa Cunferèntzia de sos ministros de sa Cultura de sos Istados federados e su cummissàriu de su Guvernu federale pro sa Cultura e sos Mèdia ant disinnadu de ismanniare sa lista de su patrimòniu culturale immateriale a livellu natzionale.

In pare cun sa Berliner Technokultur b’ant postu s’alpinismu (Bergsteigen) de Sassònia, sa traditzione canora (Sangestradition) de Finsterwalde, sa professone caratzada (Perchtenlauf) de Kirchseeon, su ricamu arbu (Weißstickerei) de su Schwalm, su binu de mela e de pira Viez.

Est cosa chi leghimus in su situ unesco.de e no est de badas chi in su tìtulu de s'artìculu in cue publicadu si faeddat de «ses intradas noas in sa lista de su patrimòniu culturale immateriale de sa Germània» («Sechs Neuzugänge auf Deutschlands Liste des Immateriellen Kulturerbes»). Duncas est una cosa tedesca ebbia e chi non pertocat sa techno ebbia. Chi, a su nessi pro como, no est patrimòniu immateriale de s’umanidade, comente imbetzes lu est su càntigu a tenore dae su 2008, pro nàrrere.

Bene, cheret chi pedemus (verbu “pedire”) a su dj de pònnere unu discu nou. Mancari “church music”, mùsica de crèsia. Bona domìniga. A s’àtera allega!